Huduma ya Kweli itakuweka huru yazindulia Dar

Na Joseph Ongong’a

Mchungaji Benjamin Bukuku

Jiji la Dar es salaam ni miongoni mwa mikoa yenye huduma nyingi za kiroho zinazofanya kazi ya kuwaleta watu kwa Yesu huku zikijipambanua kwa mfumo na mitindo mbalimbali lengo ni kuhakikisha watu wanafikiwa kwa ujumbe wa Neno la Mungu.

Jumapili iliyopita idadi ya huduma katika Jiji la Dar es salaam imeongezeka ambapo kiongozi wa huduma ya kweli itakuweka huru Mchungaji Benjamin Bukuku yenye makao makuu yake mjini moshi hatimaye ameingia jijini Dar es salaam ambapo ameanzisha kazi mpya lengo likiwa ni kuwaleta watu wengi kwa bwana Yesu.

Mamia ya wakazi wa Jiji la Dar es salaam waliweza kufurika katika ukumbi wa Chuo cha Ustawi wa Jamii ulioko maeneo ya Bamaga Mwenge ambapo katika hali isiyokuwa ya kawaida Kanisa hilo limeanza na kwaya kabisa jambo linaloonyesha kuwa walijipanga muda mrefu kiasi kwamba kuna uwezekano mkubwa kuwa huduma hii ikawa tishio kwa huduma zingine ambazo zimeanza siku nyingi lakini ukuaji wake unakuwa wa kusua sua.

Huduma hiyo ambayo inajulikana kwa jina la kweli itakuweka huru imejikita zaidi katika kuwafundisha watu kuijua kweli ya Neno la Mungu ambapo watu wakishaijua matatizo yao mbalimbali yanaondoka hata bila kuombewa ambapo jumapili iliyopita nyakati ilichuhudia jinsi mamia ya watu walivyokuwa wakifunguliwa mara baada ya mafundisho hali ambayo inahatarisha baadhi ya huduma ambazo zimekuwa zikitumia mfumo wa vitu katika kuwafungua watu.

Mchungaji Benjamin Bukuku akifafanua jambo

Ujumbe ambao uliwafungua watu ulitoka katika kitabu cha Yohana 4:1-25 ambapo mchungaji bukuku alichambua sababu 11 za uweza na ukuu wa Bwana Yesu ujumbe ambao uliteka hisia za watu hasa pale alivyokuwa akiwaeleza watu uweza wa Bwana Yesu hali ambayo ilisababisha wengi kuanza kufunguliwa hata kabla ya kuombewa.

Akiongea na Nyakati mara baada ya Ibada kumalizika Mchungaji Bukuku alisema ameamua kuja Dar es salaam ili kuudhirishia ulimwengu kuwa Yesu anaweza lengo likiwa ni kuwafumbua watu macho watoke gizani kwani kazi ambayo naanza nayo ni kuwafundisha watu kweli na kuachana na sarakasi zingine kwani watu wakishaifahamu kweli hakika matatizo kama ya Magonjwa na mengineyo yanaondoka yenyewe na hii ndio iliyonisaidia hata mimi mara baada ya kuifahamu kweli niliwekwa huru kabisa hivyo ninayofundisha ndiyo ninayoyaishi hivyo wakazi wa Dar es salaam nawaomba waniunge mkono katika ibada zetu zinazofanyika katika ukumbi wa chuo cha ustawi wa jamii ulioko bamaga mwenge kila jumapilia kuanzia saa moja hadi saa tatu asubuhi