- MWENDESHA MASHITAKA WA ICC ATAKA USHIRIKIANO, SWEDEN YAMSHITAKI MMOJA KWA MAUAJI YA KIMBARI

Arusha, Novemba 09, 2012 (FH) – Mwendesha Mashitaka wa Mahakama ya Kimataifa ya Makosa ya Jinai (ICC) wiki hii imetoa wito wa ushirikiano zaidi baina ya nchi katika kushughulikia uhalifu uliofanywa nchini Libya, wakati mahakama moja nchini Sweden imemshitaki raia wake mmoja mwenye asili ya Rwanda kwa mashitaka ya mauaji ya kimbari.

SWEDEN

Mahakama yamshitaki raia wa Sweden mwenye asili ya Rwanda: Mahakama moja nchini Sweden Jumatatu ilimshitaki raia wake mmoja mwenye asili ya Rwanda kwa madai ya kushiriki katika mauaji ya kimbari ya mwaka 1994. Mwendesha mashitaka alisema kesi yake imepangwa kuanza kusikilizwa kuanzia Ijumaa ijayo na itakuwa kesi ya kwanza ya aina hiyo kuwahi kusikilizwa nchini Sweden.Mtu huyo anadaiwa kutenda uhalifu huo mkoani Kibuye, Magharibi ya Rwanda.

RWANDA

Ngoga aishutumu Uingereza jinsi inavyoshughulikia watuhumiwa wa mauaji ya kimbari: Mwendesha Mashitaka Mkuu wa Rwanda, Martin Ngoga, Jumatatu iliishutumu Uingereza kwa kutoshughulikia ipasavyo kesi za watuhumiwa wa mauaji ya kimbari waliomo nchini humo.Alikuwa anajibu ripoti moja iliyoandikwa na vyombo vya habari nchini Uingereza kwamba mnyarwanda mmoja, Modeste Kennedy, anayedaiwa kushiriki katika mauaji ya kimbari ya mwaka 1994, yuko nchini humo akifanya kazi kama dereva wa taksi na kwamba hawezi kurejeshwa nchini Rwanda kukabiliana na mashitaka dhidi yake kutokana na uzingatiaji wa haki za binadamu.

ICTR

ICTR yapania kuhitimisha kesi zake ifikapo 2014: Maafisa wa Mahakama ya Kimataiafa ya Mauaji ya Kimbari ya Rwanda (ICTR) Alhamisi walitangaza kwamba mahakama hiyo itahitimisha kesi zake zote ifikapo mwishoni mwa mwaka 2014 kulingana na muda uliopangwa. Maafisa hao wamesema hivi sasa mahakama hiyo ina majukumu mawili muhimu.La kwanza, kuhitimisha usikikilza wa hatua ya awali ya kesi ya mwisho na pia kukamilisha hukumu za kesi katika ngazi ya rufaa na maamuzi mbalimbali yaliyosalia.

ICC

Mwendesha mashitaka wa ICC ahimiza ushirikiano: Mwendesha Mashitaka wa ICC, Fatou Bensouda Jumatano ilitoa wito wa kushirikiana zaidi baina ya nchi na mashirika mbalimbali ya Umoja wa Mataifa katika kushughulikia uhalifu uliofanywa nchini Libya. Bensouda alikuwa anawasilisha ripoti ya nne juu ya hali ya Libya, mbele ya Baraza la Usalama la Umoja wa Mataifa. Alisema tangu Machi 2011 mahakama hiyo ilipofungua upelelezi juu ya uhalifu wa kimataiafa uliotendeka katika nchi hiyo ya Afrika Kaskazini, imekwisha toa maombi ya kutaka usaidizi 130 na mengi kati ya hayo hayajatekelezwa.