KAGAME ADAI ICC FIMBO KWA WAAFRIKA,MWENDESHA MASHITAKA,MAWAKILI WAKATA RUFAA KESI YA LUBANGA

Rais Paul Kagame wa Rwanda, wiki hii amedai kwamba Mahakama ya Kimataifa ya Makosa ya Jinai (ICC) ni fimbo ya kisiasa iliyoanzishwa kuwapiga waafrika wakati pande za mwendesha mashitaka na utetezi katika kesi inayomkabili Kiongozi wa waasi wa Jamhuri ya Kidemokrasia ya Congo (DRC), Thomas Lubanga wamekata rufaa kupinga adhabu iliyotolewa.

RWANDA

Kagame aiita ICC fimbo ya kisiasa: – Rais wa Rwanda, Paul Kagame, Alhamisi amedai kwamba Mahakama ya Kimataifa ya Makosa ya Jinai (ICC) yenye mamlaka ya kuwashitaki watuhumiwa wa mauaji ya kimbari,uhalifu wa kivita na uhalifu dhidi ya binadamu, ni fimbo ya kisiasa iliyoanzishwa kwa lengo la kuwapiga waafrika. Rais Kagame alisema hayo mjini Kigali wakati akizindua Mwaka wa Mahakama wa 2012-2013 nchini humo.

ICC

Mwendesha mashitaka na mawakili wa utetezi wakata rufaa kesi ya Lubanga: Pande zote mbili, za utetezi na mwandesha mashitaka katika kesi ya kiongozi wa zamani wa wanamgambo katika Jamhuri ya Kidemokrasia ya Congo (DRC), Thomas Lubanga, zimekata rufaa kupinga adhabu aliyopewa mshitakiwa huyo ya kifungo cha miaka 14 jela. Wakati mwendesha mashitaka anapinga adhabu ya kifungo cha miaka 14 jela akitaka iongezwe, upande wa utetezi unapinga vyote viwili, kutiwa hatiani na adhabu aliyopewa.

Kesi ya Bemba yaahirishwa: Majaji wanaosikiliza kesi ya utetezi ya Jean Pierre Bemba wamelazimika kuisimamisha kwa kukosa mashahidi. Katika mkutano wa pamoja uliofanyika Jumanne, majaji walisema shahidi aliyekuwa anatakiwa kuendelea kutoa ushahidi wake mahakamani hapo Septemba 24, 2012, ametoweka huku shahidi mwingine aliyetakiwa kupanda kizimbani kutoa ushahidi wake baada ya mwenzake kuhitimisha,hakuweza hakupatikana.

WIKI IJAYO

ICC

Majaji kusikiliza ombi la Libya katika kesi ya mtoto wa Gaddafi: Majaji wanatakiwa kuketi kwa siku mbili mfululizo kusikiliza maombi ya serikali ya Libya inayopinga mahakama ya ICC kusikiliza kesi ya mtoto wa kiume wa kiongozi wa zamani wa Libya Muammar Gaddafi, Saif al-Islam Gaddafi.

ICTR

Mahakama ya Rufaa kusikiliza kesi ya mawaziri wawili wa zamani: Jumatatu ijayo, Mahakama ya Rufaa ya ICTR itasikiliza kesi ya rufaa inayowahusu mawaziri wawili wa zamani wa Rwanda, Justin Mugenzi na Propser Mugiraneza.

Hukumu rufaa ya Gatete wiki ijayo: Mahakama ya Rufaa ya ICTR, Jumanne ijayo, Oktoba 9, itatoa hukumu ya kesi ya afisa mwandamizi wa zamani wa serikali nchini Rwanda,Jean Baptiste Gatete.

NI/FK